227
2
མིང་གཞན།：
རྡོ་དཀར་བཀྲ་ཤིས་ཚེ་རིང་།
扎巴
ཞིབ་འཇུག་ཁྱབ་ཁོངས།：བོད་ཀྱི་དེང་རབས་རྩོམ་རིག།
ལས་ཁུངས།：ཀྲུང་དབྱང་མི་རིགས་སློབ་ཆེན།
ངོ་སྤྲོད་བསྡུས་པ།：བཀྲ་བྷ། འབུམ་རམས་པ། སྤྱི་ལོ1963ལོའི་ཟླ8པར་མཚོ་སྔོན་ཞིང་ཆེན་གུང་ཧོ་རྫོང་དུ་སྐྱེས་པ་དང་། ཕོ་ལོ13ལ་སོན་སྐབས་ད་གཟོད་སློབ་གྲྭར་ཞུགས་པའི་གོ་སྐབས་བྱུང་། ད་ལྟ་ཀྲུང་དབྱང་མི་རིགས་སློབ་ཆེན་གྱི་ཀྲུང་གོ་གྲངས་ཉུང་མི་རིགས་སྐད་ཡིག་རྩོམ་རིག་སློབ་གླིང་གི་དགེ་རྒན་ཆེན་མོ་དང་། བོད་ཀྱི་དེང་རབས་རྩོམ་རིག་ཕྱོགས་ཀྱི་འབུམ་རམས་པའི་སློབ་སྟོན་དགེ་རྒན་ཡིན། བཀྲ་བྷས་སྔ་ཕྱིར་བོད་ཁུལ་གྱི་དུས་དེབ་དང་ཚགས་པར་སོགས་སུ་སྒྲུང་གཏམ་དང་ལྷུག་རྩོམ། སྙན་ངག རིག་གཞུང་དཔྱད་རྩོམ་སོགས་བརྩམས་ཆོས་ཆིག་བརྒྱ་ལྷག་སྤེལ་མྱོང་བ་མ་ཟད། ད་དུང«སྒྲོལ་མ་ཉེར་གཅིག»དང«འཚུབ་མ་ཁེར་རྐྱང»«སྲིན་པོ་གཡུ་རྔོག་དང་ཉི་མ་ལྷ་ས»«བཀྲ་བྷ་ཡི་སྒྲུང་ཐུང་ཕྱོགས་བསྒྲིགས»«བྱ་ལེན་མ»«རླུང»«བོན་གྱི་ལྷ་རབས་ལ་དཔྱད་པ»«ཁྲི་འདུས་སྲོང་གི་མགུར་གླུ་ལ་དཔྱད་པ»«རཱ་མ་ཎའི་རྟོགས་བརྗོད་ཀྱི་འགྲེལ་པ»«སྒྲུང་གཏམ་གསར་རྩོམ་ལ་འཇུག་པའི་སྒོ»«རྩོམ་པ་ལ་འཇུག་པའི་སྒོ»«གསར་འགྱུར་རྩོམ་པ་ལ་འཇུག་པའི་སྒོ»«སློབ་ཆེན་རྩོམ་རིགས» སོགས་སྒྲུང་གཏམ་དང་། རིག་གཞུང་ཆེད་དེབ། སློབ་དེབ་སོགས་པར་སྐྲུན་བྱས་པ་དང་། བརྩམས་ཆོས་འགའ་ཞིག་ཧྥ་རན་སི་དང་། དབྱིན་ཇི། ཉི་ཧོང་སོགས་ཀྱི་སྐད་དུ་བསྒྱུར། བཀྲ་བྷའི་རྩོམ་རིག་བརྩམས་ཆོས་རྣམས་ལས་སྒྲུང་འབྲིང«ར་བྷ་འདྲེ་མིག་དང་རིན་ཆེན་རྐྱལ་ཁ»ཞེས་པར་མཚོ་སྔོན་ཞིང་ཆེན་གྱི་སྐབས་དང་པོའི“ན་གཞོན་རྩོམ་རིག་བྱ་དགའ”ཐོབ་པ་དང་། སྒྲུང་འབྲིང«སྲིན་པོ་གཡུ་རྔོག་དང་ཉི་མ་ལྷ་ས»དང«ནས»གཉིས་ལ་སོ་སོར་སྐབས་གསུམ་པ་དང་བདུན་པའི་སྦྲང་ཆར་རྩོམ་རིག་བྱ་དགའ་ཐོབ། སྒྲུང་འབྲིང་ཕྱོགས་བསྒྲིགས«འཚུབ་མ་ཁེར་རྐྱང»ལ་སྐབས་བཅུ་བའི་རྒྱལ་ཡོངས་གྲངས་ཉུང་མི་རིགས་རྩོམ་རིག་གསར་རྩོམ་གྱི“རྟ་མཆོག་བྱ་དགའ”བྱ་དགའ་བཅས་ཐོབ། དེ་མིན། ཀྲུང་དབྱང་མི་རིགས་སློབ་ཆེན་དུ་དགེ་རྒན་གྱི་ལས་ཀ་གཉེར་རྗེས། སྔ་གཞུག་ཏུ་འཇར་མན་དང་། དབྱིན་ཇི། ཁཱ་ན་ཏ། ཉི་ཧོང་སོགས་ལ་ཕྱིན་ཏེ་རིག་གཞུང་གྲོས་ཚོགས་ལ་ཞུགས་པ་མ་ཟད། རྒྱལ་ཁབ་སྤྱི་ཚོགས་ཚན་རིག་ཐད་ཀྱི་གཙོ་གནད་ལས་གཞི་སྟེ«བོད་ཀྱི་ལྷ་རབས་བསྡུ་སྒྲིག་དང་ཞིབ་འཇུག»ཅེས་པ་གཙོ་སྐྱོང་བྱས། བཀྲ་བྷས་རྩོམ་རིག་གསར་རྩོམ་དང་། རྩོམ་རིག་ཞིབ་འཇུག རྩོམ་རིག་སློབ་ཁྲིད་ཐད་ནས་གྲུབ་འབྲས་མི་དམན་པ་བླངས་པའི་རྐྱེན་གྱིས། སྤྱི་ལོ2013ལོར་པེ་ཅིང་གྲོང་ཁྱེར་གྱི་ཕུལ་བྱུང་དགེ་རྒན་གྱི་མཚན་སྙན་ཐོབ་པ་དང་། སྤྱི་ལོ2014ལོར་པའོ་ཀང་ཕུལ་བྱུང་དགེ་རྒན་ལས་ཁྱད་འཕགས་བྱ་དགའི་མིང་འདོན་བྱ་དགའ་ཐོབ་པ་ཡིན་ནོ།།
